Subscribe Twitter

Sunday, October 3, 2010

ဝိပဿနာညဏ်စဉ်များ

(ပုံတော်အား Facebook သူငယ်ချင်းထံမှ Download ယူခြင်းဖြစ်ပါသည်-သူငယ်ချင်းကျေးဇူးပါ)
    ၀ိပဿနာညဏ်စဉ်များဆိုသည်မှာ ဒွါရခြောက်ပါး (မျက်စိ၊ နား၊ နှာခေါင်း၊ လျာ၊ ကိုယ်၊ စိတ် ) တို့တွင် ထင်လာ သော ရုပ်၊ နာမ်တရားများဖြစ်သည်။ အနိစ္စ၊ ဒုက္ခ၊ အနတ္တသဘောတို့ကို ပစ္စုပန်ကျကျ မြင်လာအောင် ရှုမှတ် သောညဏ်စဉ်များဖြစ်သည်။ ၀ိပဿနာအခြေခံ ၀ိသုဒ္ဓမဂ် (မဂ်၏စင်ကြယ်ကြောင်း)  လေးမျိုးကို အရင်သိရပါမည်။
အနိစ္စ၊ ဒုက္ခ၊ အနတ္တ မရှုသေးဘဲ
၁။ သီလစင်ကြယ်အောင် (သိလ၀ိသုဒ္ဓိ)
၂။ သမာဓိရအောင် (စိတ္တ၀ိသုဒ္ဓိ)
၃။ ရုပ်၊ နာမ် အတွက် (ဒိဌိဝိသုဒ္ဓိ)
၎။ ရုပ်၊ နာမ်အကြောင်း အကျိုးအတွက် (ကင်္ခါဝိတရဏ ၀ိသုဒ္ဓိ)
        ၀ိသုဒ္ဓိလေးပါးသည်ဝိပဿနာဆိုင်ရာများဟုမဆိုသာပေ၊ ရုပ်၊ နာမ်ကို သိ၍ ဒိဌိကို အထိုက် အလျှောက်ပယ် သောသူအား စူဠသောတာပန်ဟု ကျမ်းဂန်များတွင် သတ်မှတ်ကြပေသည်။ မြတ်စွာဘုရားသည် အကြောင်းအားလျော်စွာ တရားများဟောကြားရာတွင် ထိုသူ၏ပါရမီကိုကြည့် ၍ဟောကြားခြင်းဖြစ်သည်။ သာဝက ရဟန္တာကြီးများက လူအများ နားလည်နိုင်စေရန် ခွဲခြမ်းစိတ်ဖြာ၍ ဟောကြားပို့ချကြသည်။ မြတ်စွာ ဘုရားသည် ညဏ်စဉ် (၁၀)ပါးသာ ဟောကြားတော်မူသည်။ (သင်္ဂြိုကျမ်း) အရှင်သာလိပုတ္တရာမှ ထိုညဏ်စဉ် (၁၀) ပါးအား ထပ်မံ၍ (၁၆) ပါးဟောကြားပါသည်။ ညဏ်စဉ်များမှာ အောက်ပါအတိုင်းဖြစ်ပါသည်......(၁၀) ပါးသောဉာဏ်စဉ်များသာ ကျွန်တော်ရေးပြပါမည်။

၁။  သမ္မသနဉာဏ် (ရုပ်၊ နာမ်တို့အပေါ်တွင် အနိစ္စ၊ ဒုက္ခ၊ အနတ္တဟု သုံးသပ်သောဉာဏ်)
၂။   ဥဒယဗ္ဗယဉာဏ် (ရုပ်၊ နာမ်တို့အပေါ်တွင် ဖြစ်ပျက်ကို သိသောဉာဏ်)
၃။  ဘင်္ဂဉာဏ် (ရုပ်၊ နာမ်တို့အပေါ်တွင် အပျက်ကို သိသောဉာဏ်)
၎။  ဘယဉာဏ် (ရုပ်၊ နာမ်တို့အပေါ်တွင်ကြောက်စရာ ဘေးဟုထင်သောဉာဏ်)
၅။  အာဒိန၀ဉာဏ် (ရုပ်၊ နာမ်တို့အပေါ်တွင် အပြစ်မြင်သောဉာဏ်)
၆။  နိဗ္ဗဒါဉာဏ် (ရုပ်၊ နာမ်တို့အပေါ်တွင် ငြီးငွေ့ဖွယ် ဟုမြင်သောဉာဏ်)
၇။  မုစ္စိတုကမျတဉာဏ် (ရုပ်၊ နာမ်တို့၏ လွတ်မြောက်လိုသောဉာဏ်)
၈။  ပဋ္ဋိသင်္ခါဉာဏ် (ရုပ်၊ နာမ်တို့အပေါ်တွင် အနိစ္စ၊ ဒုက္ခ၊ အနတ္တဟု ထပ်မံရှုသောဉာဏ်)
၉။  သင်္ခါရုပေက္ခာဉာဏ် (ရုပ်၊ နာမ်တို့အပေါ်တွင် လျစ်လျူရှုသောဉာဏ်)
၁၀။ အနုလောမဉာဏ် (ရှေး ၀ိပဿနာဉာဏ်များနှင့် နောက်ဗောဓိပက္ခိယတရားများအား လျော်သောဉာဏ်)
        
                 ဤနေရာတွင် အနုလောမဉာဏ် ၏နောက်တွင် (၃) ပါးကျန်ပါသေးသည်။ ထိုသုံးပါးသည် အနုလောမဉာဏ် ရောက်သည်နှင့် ဆက်တိုက်တက် ၍လှမ်းသွားခြင်းဖြစ်ပါသည်။ အနုလောမဉာဏ် အောက် ဉာဏ်များသည် အားထုတ်မှုနည်းပါက ဥဒယဗ္ဗယဉာဏ် (ရုပ်၊ နာမ်တို့အပေါ်တွင် ဖြစ်ပျက်ကို သိသောဉာဏ်) ထိပြန်လည်ကျသွားပြန်သည်။ ထိုဉာဏ် အောက်ပြန်မရောက်နိုင်တော့ပါ။ ခုကျွန်တော်ဖော်ပြအပ်သော ဉာဏ်စဉ်များသည် မြတ်စွာဘုရားဟောကြားအပ်သော ဉာဏ်စဉ်များသာဖြစ်ပေသည်။ လောကုတ္တရာနှင့် သာသက်ဆိုင်သောဉာဏ်များလည်းဖြစ်ပေသည်။ အားထုတ်မှသာရရှိသောဉာဏ်များဖြစ်သည်။ မိမိ ကိုယ်တိုင် အကျင့် (စရဏ) များပါမှ ကိလေသာနည်းပါမှ၊ သမာဓိအားကောင်းပါမှရရှိနိုင်ပါသည်။

(ကျမ်းကိုး-ဉာဏ်စဉ်များအား ဆရာဦးရွှေအောင်ရေးသားသည့် အတ္တ၀ါဒမှ အနတ္တ၀ါဒသို့ခရီးစဉ်စာအုပ်မှ ယူထားခြင်းဖြစ်ပါသည်.။)